Programy Mozilla serbsce

Kompjuterowe programy serbsce - je to hišće rědkosć. To ma hłownje tři přičiny - wjele programow njeje "Open Source", to rěka, wono njeje za kóždeho přistupne, přełožowanje programow do rěčow narodnych mjeńšin so njedani a naposledku je wěsće přemało serbskich programowarjow. Njetrjebaće wšak programowar być, zo byšće kompjuterowe programy přełožił. Zahoritosć a elan dosahatej. A trochu zmužitosće na riziko. Riziko tohodla, dokelž dyrbiće so diskusiji wo najlěpšich serbskich zapřijećach wustajić, dokelž po mojim znajomstwje připóznata serbska kompjuterowa terminologija hišće dowuwita njeje.

Čehodla serbskorěčne kompjuterowe programy?

Budźeće so zawěsće prašeć, za čož tež trjebamy serbskorěčne kompjuterowe programy? Wězo móhli Serbja z němskorěčnymi programami dźěłać. Ale, zo by so serbšćina jako rěčana a pisana rěč wobchowała, dyrbi wona narokam přichoda wotpowědować, samo hdyž wona dyrbi zhubjeny teren z prócu wróćo dobyć. Štož nastupa kompjuterowu terminologiju, samo za němčinu strach wobsteji, zo wona jednoho rjaneho dnja hižo kmana njebudźe, zo by swójske kompjuterowe wurazy tworiła. Hižo dźensa wona wjele jendźelskich słowow wužiwa.

Kotre programy eksistuja na tutym sydle?

Slědowace programy Mozilla su: wobhladowak Firefox, póstowy program Thunderbird a Firefox za Android za smartfony a tablety. Nimo toho je hornjoserbski pakćik za HTML-editor KompoZer. Dalše informacije w hornjoserbskej rěči namakaće tež w hornjoserbskej Wikipediji:

• Firefox
• Firefox Mobile
• Thunderbird
• KompoZer

Něhdy su tež přełožki za programy SeaMonkey (programowa suita), Sunbird (protykowy program) a Nvu (HTML-editor) byli, ale přełožki za SeaMonkey su zestarjene a wuwiwanje programow Sunbird a Nvu su zastajili.

Nimo toho je cyły rjad programowych rozšěrjenjow hornjoserbsce. Hlej nalěwo w nawigaciskej lajsće pod Přidatki hornjoserbsce.

Nadawki za přichod

Wězo je to jenož mało programow a jenož tajke organizacije Mozilla. Ale trjebamy wo wjele wjace programow w serbšćinje, započinajo z dźěłowym systemom, dale programy za tekstowe předźěłowanje, tekstowe a druhe editory, tabelowe kalkulacije, software za datowe banki, za prezentacije, za wobdźěłowanje wobrazow, widejo- a awdiodatajow, webnałoženja za mobilne graty, ale tež software za kompjuterowe hry.

Programy móža tež k programowym paketam hromadu zwjazane być (na př. běrowe pakety MS Office a Libreoffice). Je wězo wjele wjace softwary, na př. fachowa softwara kaž na př. knihiwjedniska softwara za hospodarstwo. Je tuž hišće wjele činić. Dajmy so do toho!